كسكس بالمرقة الحمراء

في قدر الكسكسي السفلي، حطي الزيت وسخنيه مليح، زيدي البصل واللحم وخليهم يتقلاو حتى يذبال البصل ولون اللحم يتغير.

زيدي الطماطم المبشورة، معجون الطماطم، الملح، الفلفل الأسود، العكري، راس الحانوت والقرفة، وخلطي كلش مليح وخليها تتقلى على نار هادية 10 دقايق، حتى تخرج الزيت فوق الوجه.

مرقي بالماء السخون حتى يتغطى اللحم مليح، زيدي الحمص وخليها تطيب على نار متوسطة حتى يطيب اللحم نص طياب.

في هذي الأثناء، حضري الكسكس: شمخيه بشوية ماء دافي وخليه يتشرب، حلي الحبات بيديك باش ما يلصقوش.

حطيه في الكسكاس، وديريه فوق القدر اللي فيه المرق يفور أول تفويرة، كي يطلع البخار حسبيله 15 دقيقة ونحيه.

فرغي الكسكس في قصعة، سقيه بشوية ماء وملح، وحليه مليح بيدك باش يتشرب الماء ويبرد، زيدي شوية زيت ورجعيه يفور للمرة الثانية 15 دقيقة أخرى.

المرة الأخيرة، نحيه من الكسكاس، حطي اللفت والجزر في المرق يطيبوا مع اللحم، والقرعة خليها للأخير باش ما تتفتتش.

زيدي القرعة وحبة الفلفل الحار (إذا استعملتيه) وخليها تكمل طيابها حتى يطيب كلش والمرقة تعقاد شوية.

بعد ما تفوري الكسكس للمرة الثانية، زيديه للمرة الثالثة والأخيرة 10 دقايق باش يتشرب ريحة المرق مليح ويجي بنين.

ادهني الكسكس بالزبدة أو السمن، وحطيه في صحن التقديم، سقي بالمرقة وقطع اللحم والخضرة والحمص وزينيه.