بيتزا كوفار

في جفنة، حط الفرينة، الخميرة، السكر والملح، اخلطهم مليح.

زيد عليهم زيت الزيتون و ابدأ تلم بالماء الدافئ بشوية بشوية حتى تتحصل على عجينة طرية و ما تلصقش.

ادلك العجينة لمدة 10 دقايق حتى تولي ملساء، غطيها و خليها تخمر في بلاصة دافية حوالي ساعة حتى يتضاعف حجمها.

للحشوة، في مقلة حط الزيت، البصل و الفلفل، قليهم حتى يذبال البصل.

زيد الثوم، الطماطم المرحية، الطماطم المصبرة و التوابل (فلفل عكري، فلفل كحل، كمون و الملح).

خليهم يطيبوا على نار قليلة حتى تنشف الصلصة و تتجمر مليح، إذا استعملت التونة زيدها في الأخير و خلط.

كي تخمر العجينة، قسمها على زوج كويرات متساوية، حل كل كويرة بالحلال على شكل دائرة رقيقة.

حط الدائرة الأولى في بلاطو مدهون بالزيت، حط فوقها الحشوة وخلي الأطراف فارغين.

غطيها بالدائرة الثانية، غلق الأطراف مليح بيديك أو بالشوكة باش ما تتحلش في الطياب.

ادهن الوجه بالبيضة المخفوقة، زين بالزيتون الأسود و دير ثقوب صغيرة بالشوكة باش ما تتنفخش بزاف.

طيبها في فرن مسخن من قبل على درجة 180°C لمدة 20-25 دقيقة حتى يحمار الوجه و يولي ذهبي.

خرجها من الفرن، خليها تبرد شوية و قطعيها مربعات و قدميها سخونة.