بقلاوة قسنطينية تقليدية

نحضر العجينة: نخلط الفرينة، الملح، الفانيليا، الزبدة الذائبة ونبسس الخليط مليح حتى يتشرب الفرينة الزبدة.

نضيف خليط الماء وماء الزهر تدريجيا ونعجن حتى نحصل على عجينة طرية ومتماسكة، نغطيها ونخليها ترتاح ساعة.

نحضر الحشوة: نخلط اللوز، السكر، القرفة، الزبدة الذائبة، ونرش بماء الزهر تدريجيا حتى يصير الخليط مرمل ومبلول شوية.

نقسم العجينة لـ 12 كرة متساوية، 6 للفوق و 6 للتحت، ونغطيهم ونخليهم يرتاحو ربع ساعة.

نحل كل كرة رقيقة بزاف باستعمال النشاء، نحط 6 طبقات في صينية مدهونة بالزبدة، ندهن كل طبقة بالزبدة الذائبة.

نحط الحشوة ونوزعها بالتساوي، ثم نغطيها بالـ 6 طبقات المتبقية بنفس الطريقة، ندهن كل طبقة بالزبدة.

نقطع البقلاوة لمربعات أو معينات ونزين كل حبة بحبة لوز في الوسط.

نسقيها بكمية مليحة من الزبدة الذائبة، حوالي كاس كبير، وندخلها لفرن مسخن على 160 درجة مئوية لمدة ساعة وربع حتى يصير لونها ذهبي غامق.

نحضر الشربات: نخلط السكر والماء وشريحة الليمون ونحطهم على النار حتى يغلي لمدة 10 دقائق، ثم نضيف ماء الزهر ونطفي النار.

كي نخرج البقلاوة سخونة من الفرن، نسقيها مباشرة بالشربات الباردة كاملة، ونخليها تتشرب مليح لمدة 12 ساعة على الأقل.

نقطعها ونقدمها مع فنجان قهوة أو شاي.

بالصحة والهناء!