صمصة جزائرية مقرمشة ومعسلة

في وعاء كبير، حطي الفرينة، المارغرين الذائبة الباردة، الفانيليا، وقرصة الملح، بسّسي المكونات مليح بين يديك حتى تتجانس.

ضيفي ماء الزهر تدريجيا و لمّي العجينة بلا ما تعجنيها بزاف، حتى تولي طرية ومتماسكة، غطيها وخليها ترتاح ساعة في الثلاجة.

حضّري الحشو: خلطي اللوز المطحون، السكر، القرفة، المارغرين الذائبة، وماء الزهر، عجنيها بيدك شوية حتى تتلم ويولي عندك خليط معسل.

أخرجي العجينة من الثلاجة، اقسميها لكرات صغيرة، وحلي كل كرة رقيقة جدا على شكل مستطيل طويل باستعمال آلة العجين (ماشينة البقلاوة) حتى الرقم الأخير الرقيق.

قطعي العجينة المستطيلة لشرائط بعرض 5-6 سم.

حطي كمية صغيرة من الحشو في طرف الشريط، وابداي تشكلي مثلثات الصمصة، اطوي الشريط على الحشو بشكل مثلث مع الضغط على الأطراف باش ما يتحلش في القلي.

سخني الزيت في مقلاة عميقة على نار متوسطة، حطي حبات الصمصة تقلى حتى يصير لونها ذهبي فاتح من كل الجيهات.

نحي حبات الصمصة مباشرة من الزيت السخون وحطيهم في العسل البارد، خليهم يتشربوا العسل لمدة 5 دقائق على الأقل.

قطريهم من العسل الزايد، وزينيهم بالجلجلان المحمص وهوما سخونين شوية باش يلصق الجلجلان، وشهية طيبة.