رشتة الأعراس بالدجاج والمرقة البيضاء

في قدر كبير، سخن الزيت وحمر قطع الدجاج حتى تأخذ لون ذهبي خفيف من كل الجوانب.

ضيف البصل المسكرفج، الملح، الفلفل الأسود، القرفة المرحية وعود القرفة. قلب مليح حتى يذبال البصل ويطلق بنتو.

مرق بالماء السخون حتى يتغطى الدجاج تماما. كي تبدا تغلي، نقص النار وخليها طيب حوالي 30 دقيقة.

بعد نص ساعة، ضيف اللفت والحمص، وإذا درت البطاطا ضيفها معاهم. كمل الطياب حتى يطيب الدجاج والخضرة مليح.

في نفس الوقت، حل الرشتة في جفنة بشوية زيت زيتون باش ما تلصقش. فورها التفويرة الأولى فوق قدر الكسكسي لمدة 15 دقيقة من خروج البخار.

بعد التفويرة الأولى، حط الرشتة في جفنة، رشها بكاس ونص ماء بارد مملح (مع مراعاة كمية الملح في المرقة) وخليها تتشرب مليح. حلها بيديك بلطف.

فورها التفويرة الثانية لمدة 15-20 دقيقة حتى تشوف البخار يطلع بقوة والرشتة تطرا.

كرر عملية التفويرة للمرة الثالثة بنفس الطريقة، رشها بالماء وخليها تتشرب ومن بعد فورها. في التفويرة الثالثة، كي تحطها في الجفنة، حطلها ملعقة كبيرة زبدة أو سمن ودخلها مليح فيها.

كي يطيب الدجاج والخضرة، نحي الدجاج وحمره شوية في مقلة ولا في الفور حتى ياخذ لون شباب.

قدم الرشتة سخونة في صحن كبير، حط الدجاج في الوسط وزين بالخضرة والحمص ومرق بشوية مرقة بيضاء. حط باقي المرقة في صحن وحدو.