رشتة بالدجاج التلمسانية الأصيلة

في قدر كبير، حطي الزيت والسمن، كي يذوب السمن حطي قطع الدجاج وخليهم يتقلاو مليح حتى ياخذو لون ذهبي من كل الجوانب.

ضيفي البصل المفروم والملح والفلفل الأسود وعود القرفة، وخلطي مليح وخليهم يتقلاو حتى يذبال البصل تماما.

زيدي الحمص المنقوع ومرقي بالماء الساخن حتى يتغطى الدجاج، خليها تغلي ونقصي النار وخلي الدجاج يطيب.

في نفس الوقت، حطي الرشتة في جفنة وادهنيها بشوية زيت، فوريها المرة الأولى لمدة 15 دقيقة حتى تشوفي البخار يطلع منها.

بعد ما تفور، سقي الرشتة بكاس ماء بارد مملح وحليها مليح بيديك باش ما تلصقش، خليها تشرب الماء.

رجعي الرشتة تفور المرة الثانية لمدة 15 دقيقة أخرى، عاودي نفس العملية مع كاس ماء بارد ورشة ملح صغيرة.

كي يطيب الدجاج تقريبا، نحيه من المرق وحطيه في صينية الفرن ادهنيه بشوية سمن وحمريه حتى يصير لونه ذهبي ومقرمش.

في المرق، زيدي اللفت وكي يكون الدجاج قريب يطيب زيدي البطاطا (إذا استعملتيها) وخليها تكمل طيابها.

فوري الرشتة للمرة الثالثة والأخيرة، بعد ما تفور حطيها في الجفنة وزيدي عليها ملعقة كبيرة سمن وقليل من القرفة البودرة وخلطي مليح باش تتشرب السمن.

في صحن التقديم، حطي كمية من الرشتة، سقيها بالمرقة الساخنة، وحطي فوقها قطع الدجاج المحمر والخضرة.

زيني بحبات حمص و شوية قرفة بودرة وزيديلها رشّة زيت زيتون اذا حبيتي، وتقدم ساخنة.